Namasteholland, News, Information and Technology

News from Netherlands. Nepali news. world news. Entertainment news.

अन्तरराष्ट्रिय

आप्रवासी बच्चालाई परिवारबाट अलग्याउने ‘ट्रम्प नीति’को मेलानियाले गरिन् विरोध

अमेरिकी प्रथम महिला मेलानिया ट्रम्पले विवादास्पद अध्यागमन नीतिबारे आफ्नो प्रतिक्रिया व्यक्त गरेकी छन् । उनले अवैधरुपमा अमेरिका प्रवेश गरेका परिवारलाई आफ्नो बच्चाबाट अलग गराउने नीतिको विरोध गरिन् ।

‘मेलानिया साना बच्चाहरुको आफ्नो परिवारसँग विछोड भएको हेर्न चाहन्नन्, त्यसैले उनले यस अध्यागमन नीतिमा सुधार चाहेकी छिन्,’ उनकी प्रवक्ताले भनिन् ।

राष्ट्रपति डोनाल्ड ट्रम्पले हालसालै लागु गरेको ‘शून्य सहनशीलता’ अध्यागमन नीतिबारे विवाद बढ्दै जाँदा प्रथम महिलाको यस्तो प्रतिक्रिया आएको हो ।

त्यस्तै पूर्वप्रथम महिला लाउरा बुसले पनि अध्यागमन नीति अनैतिक भएको बताएकी छिन् ।

आप्रवासन नीतिमाथि ‘शून्य सहनशीलता’ नीति लागु भएसँगै अवैध रुपमा अमेरिका प्रवेश गर्न खोज्नेमाथि कारवाही सुरु भएको छ । यसबीच ६ साताको अवधीमा मात्रै अमेरिकामा दुईहजार भन्दा धेरै पारिवारिक वियोग भएको छ ।

अवैधरुपमा अमेरिका प्रवेश गरेर आश्रय खोज्ने योजना बनाउने वयस्कहरुलाई हिरासतमा राखेर फौजदारी मुद्धा लगाइन्छ । उनीहरुसँग भएका बच्चालाई भने मुद्धा लगाउन नमिल्ने भएकाले आमाबुबाबाट अलग गरेर छुट्टै शिविरमा राखिएका छन् ।

अमेरिकी सरकारको यस नीतिको मानव अधिकारवादी समूहहरुले आलोचना गरेका छन् ।

मेलानियाले बच्चाहरुलाई आफ्नो बुबाआमाबाट अलग गरेको देख्न नसक्ने बताउँदै रिपब्लिकन र डेमोक्रयाट दुवै पक्ष मिलेर यस समस्याको समाधान गर्न अध्यागमन नीतिमा सुधार गर्नुपर्ने सुझाव दिएकी छिन् ।

विज्ञप्तिमा उनले भनेकी छन्, ‘अमेरिका त्यस्तो देश हुनुपर्छ, जसले सबै कानूनहरु पालना गर्छ र शासन गर्दा कहिलेकाहीँ भावनात्मक कुरालाई पनि ध्यान दिन्छ ।’

त्यस्तै पूर्व राष्ट्रपति जर्ज डब्ल्यु बुसकी पत्नी लाउरा बुसले नीतिको सार्वजनिक रुपमा विरोध गरेकी छन् । उनले वासिङ्टन पोस्टमा लेखेकी छन्, ‘शुन्य सहनशीलता नीति क्रुर छ । यो अनैतिक छ र यसले मेरो चित्त दुखाएको छ ।’

‘हाम्रो सरकार बच्चाहरुलाई गोदामजस्तो शिविरमा कोचेर राख्ने वा उनीहरुलाई मरुभूमीमा पालको शहरमा राख्ने योजनामा लाग्नुहुँदैन,’ उनले लेखेकी छिन्, ‘यी तस्वीरहरुले जापान-अमेरिका युद्ध ताकाको नजरबन्द शिविरको झल्को दिएको छ ।’

यस्ता छन् ‘सुपर डिटेन्सन सेन्टर’

सुरक्षा पोस्टहरु, माथि राखिएका ठूला झ्याल र विभिन्न सन्देश लेखिएका छेकबारहरु नहुने हो भने यो आइतबारको दिन वालमार्ट सुपरमार्केट जस्तो देखिन्छ ।

तर, यो ब्राउन्स भिल्ले टेक्सासस्थित कासा पाड्रे डिटेन्सन सेन्टर हो र यी मानिसहरु सपिङ गर्न आएका होइनन् । उनीहरु त ‘शून्य सहनशीलता’ अध्यागमन नीतिको प्रभावको बारेमा बुझ्न आएका अमेरिकी नीति निर्माताहरु हुन् ।

शिविरको निरीक्षण गरेपछि ओरेगनका डेमोक्रेटिक सिनेटर जेफ मर्कलले भने, ‘उनीहरुले यसलाई ‘शून्य सहनशीलता’ नाम दिएका छन् तर, यसको उपयुक्त नाम शुन्य मानवतावाद हुनुपर्ने थियो ।’

‘हामीले एउटा ठूलो गोदाम देख्यौं र यो पहिले वालमार्टको सुपर स्टोर थियो र अहिले सुपर डिटेन्सन सेन्टर भएको छ । जहाँ १५ सय जति बच्चाहरु राखिएका छन्’ उनले भने ।

‘शिविरको पर्खालहरु अग्ला छन्, भित्र लामा कोरिडोरहरु छन् जसमा धेरै बेडरुमहरु छन् र त्यहाँ केही साझा ठाँउ पनि छ’ उनले भने ।

दोष कसको ?

राष्ट्रपति ट्रम्पले डेमोक्र्याटहरुले बनाएको एक कानून नयाँ नीतिको लागि जिम्मेवार रहेको बताएका छन् । तर, उनले कुन कानूनको कुरा गरेका हुन् भन्ने बारेमा प्रष्ट भएको छैन् ।

शनिबार गरेको एक टि्वटमा उनले डेमोक्रयाटहरुलाई रिपब्लिनसँग नयाँ कानून बनाउन रिपब्लिकनहरुलाई सहयोग गर्न आग्रह पनि गरे ।
तर, आलोचकहरुले बच्चाहरुलाई आफ्नो बुबाआमाबाट छुट्याउने नीति अमेरिकी महान्यायाधिवक्ता जेफसेसन्सले अघिल्लो महिना घोषणा गरेको र त्यसलाई रोक्न सदनको कुनै कारबाही आवश्यक नपर्ने बताएका छन् ।

विश्लेषकहरुका अनुसार नीतिको सबैभन्दा महत्वपूर्ण परिवर्तन अवैध रुपमा सीमा पार गर्न खोज्ने आमाबुबाहरुलाई फोजदारी मुद्दा लगाउने न्याय विभागको निर्णय हो । बच्चाहरुलाई मुद्धा नलगाइने भएकाले उनीहरुलाई संगै हिरासतमा राखिँदैन ।

अमेरिकी सीमा अधिकारीहरुका अनुसार ‘शून्य सहनशीलता’ नीति कार्यान्वयनमा आएको दुई सातामै ६ सय ५८ बच्चाहरुलाई आमाबुबाबाट छुट्याइएको छ ।

धेरैजसो केसहरुमा आमाबुबा हिरासतबाट रिहा भएपछि उनीहरुको पुनर्मिलन भएको छ । तर केहि रिपोर्टहरुका अनुसार बच्चाहरुलाई केही हप्ता वा महिनासम्म पनि आमाबुबाबाट अलग राखिएको छ ।

यस नयाँ कडा नीतिले आप्रवासीहरुलाई अवैध रुपमा अमेरिका आउनबाट कत्तिको रोक्छ भन्ने चाहिँ प्रष्ट भएको छैन ।

हिंसा र गरिबीको कारण होन्डुरस, एल साल्भाडोर लगायतका धेरै देशहरुबाट भागेर अवैध रुपमा अमेरिका प्रवेश गरी शरण लिन खोज्ने आप्रवासीहरुको सङ्ख्या अझै पनि उच्च रहेको छ ।

-बीबीसीबाट

तल प्रतिकृया दिनुहोस

error: Content is protected !!